【人物講嘢】楊開荊(澳門文獻信息學會理事長)

澳門嘅世遺建築相信大家都認識,但澳門嘅歷史文獻資料都有重要嘅價值,今期我地訪問到從事澳門文獻同記憶工程研究嘅楊開荊博士,帶大家了解一下歷史文獻嘅魅力,一同追尋澳門嘅記憶。

記:Isaac H:楊開荊 Helen

記:楊博士,可否介紹一下目前嘅主要工作,以及你所擔任嘅各個角色?

H:我現時喺澳門基金會研究所工作,工作範疇以《澳門記憶》項目為主,收集澳門居民嘅生活文化等資料,亦係澳門文獻信息學會理事長、澳門社會科學學會會長、澳門大學澳門研究碩士班《澳門歷史遺產研究》課程導師。

了解教區的文獻檔案
了解教區的文獻檔案

功德林文獻遺產豐富
功德林文獻遺產豐富

記:楊博士主要研究嘅領域係?

H:澳門歷史文獻資源、信息資源管理、澳門歷史遺產、澳門記憶項目、聯合國教科文組織《世界記憶工程》等研究。澳門嘅宗教文獻係我嘅重點項目,喺二〇一〇年同二〇一五年,我同我哋協會嘅成員成功將《天主教澳門教區檔案文獻(16-19世紀)》同《澳門功德林檔案文獻(1645-1980)》申請列入聯合國教科文組織亞太區《世界記憶名錄》。

在UNESCO世界記憶工程亞太區會議引介功德林文獻項目(圖片由受訪者提供)
在UNESCO世界記憶工程亞太區會議引介功德林文獻項目(圖片由受訪者提供)

記:介紹一下近期嘅工作及研究方向?

H:我哋澳門文獻信息學會,聯同澳門城市大學合作設立「澳門世界記憶學術中心」,即將於十一月二十日號開幕,與UNESCO世界記憶工程開展合作,推動文獻管理及利用;而澳門社會科學學會與城市大學正推出「澳門城市文化名片評選活動」。同時,澳門基金會嘅項目《澳門記憶》資料庫一直同項目團隊同事收集一啲唔同年代嘅澳門舊照片同埋各種資料,包括有“澳門人的澳門記憶”、“老店舖記憶”、“校園記憶”、“工廠記憶”、“街道記憶”等,而網站建構正進入尾聲,好快可以公開畀公眾瀏覽使用。

與學會同仁分享喜悅(圖片由受訪者提供)
與學會同仁分享喜悅(圖片由受訪者提供)

記:點解會從事歷史文獻嘅研究工作?

H:我發覺大家習慣只聚焦歷史建築或文物,但其實文獻更能反映到人類活動嘅狀況,透過書信、日記、帳目或工作檔案,一啲日常嘅文字或數據記錄,可以睇到當時嘅人喺生活上嘅細節,更真實具體地反映事實,有啲文獻更蘊藏咗舊時名人嘅生活往事。文化遺產其實係包括物質文化遺產、非物質文化遺產以及文獻。一般澳門嘅大眾都忽略咗文獻嘅價值,係一個缺失。我有次去美國,見到好多美國人排隊睇《獨立宣言》原稿,佢地會認為呢啲文獻係國家精神嘅象徵。我以前喺圖書館工作,知悉澳門都有好多珍貴嘅歷史值得保留,後來去修讀文獻學,之後聯同志同道合嘅人,共同推動澳門文獻工作,係一件充滿樂趣同肯定自己價值嘅事情。

楊開荊有關圖書館及文獻的著作
楊開荊有關圖書館及文獻的著作

記:從事歷史文獻研究工作,有咩成就感?

H:研究文獻可以發現和探索小城嘅歷史,彰顯出澳門獨特嘅文化底蘊,而申請將澳門嘅文獻列入《世界記憶名錄》可以令國際社會更加了解澳門。

位於澳門城市大學的UNESCO世界記憶學術中心(圖片由受訪者提供)
位於澳門城市大學的UNESCO世界記憶學術中心(圖片由受訪者提供)

記:對政府目前嘅文獻管理、以及文化遺產政策有何意見?

H:期望可以將更多嘅文獻電子化,開放畀大眾公開檢索,善用資訊。而有價值嘅文物應該都保留,但唔可以一成不變,要平衡發展,要想辦法收集民意,營造討論氛圍,大家都可以一齊參與。

民署大樓內的圖書館,擁有大量珍貴古藉
民署大樓內的圖書館,擁有大量珍貴古藉

記:對澳門未來嘅期望?

H:希望生活素質同精神素質都能得到提升,因為文化係城市嘅靈魂,係一個地方嘅永恆價值,呢種文化價值,又往往成為人嘅精神依託同心靈棲息重要元素。經濟發展得太快,令人迷失,好多人嘅價值觀都係以錢為先,係好危險嘅事。澳門嘅鄉土教育不足,年輕一代欠缺歸屬感,希望澳門各方面都能重視歷史文化,培養年輕人了解同學習文獻管理,了解澳門歷史文化,提升佢地嘅思想境界。

記:最後,同大家分享一句說話?

H:掌握知識,掌握世界。

(訪後餘記:澳門地方雖小,歷史底蘊卻異常深厚,古今中外嘅名人蹤跡,各種奇聞軼事,講極都講唔完,喺世界歷史上都可謂絕無僅有。以後大家除咗參觀世遺之外,都可以試下多啲探究澳門嘅歷史小故事,或者會有意想不到嘅收穫!)

記者/Isaac

澳門基金會:http://www.fmac.org.mo/

澳門文獻信息學會:http://macau-mdis.org/

「掌握知識,掌握世界。」
「掌握知識,掌握世界。」

您可以选择一种方式赞助本站

发表评论

:?: :razz: :sad: :evil: :!: :smile: :oops: :grin: :eek: :shock: :???: :cool: :lol: :mad: :twisted: :roll: :wink: :idea: :arrow: :neutral: :cry: :mrgreen: